He hun hmanna pui ber Lungleiah chuan Lunglei Tennis Court hlui hmunah hun hman a ni a. Rbt. F. Lalremruatpuia, Vice President MṬKP chuan hun a kaihruai a, MṬKP President Upa R.Lalrochama`n hunserh hmangin, Rev. F. Zorinkhuma, Secretary MṬKP chuan kalkhawmte chu hriselna kawnga hma an lakna tura intiamtirna hun a hmang bawk.

James Miahlung, Addl. DC, Lunglei, Jerome Lalmuankima, SP Lunglei leh Dr. Lalrinthangi Deputy Chief Medical Officer, Lunglei ten he hun hi an hmanpui a. Healthy Lunglei Campaign atangin Screening Non-Communicable Diseases (NCD) neih niin TKP member a duh apiang tan screening hi neih chhunzawm nghal a ni.

Aizawlah chuan Vanapa Hall kawtah hun hman a ni a. Rev. RC. Lalthanzama, Zotlang Bialtu Pastor chuan hunserh hmangin, Lalrinpuii, Hon'ble Minister, Health and Family Welfare chuan he hun hi hmanpuiin fuihna thu a sawi hnuah tlan turte a vai liam.

Lawngtlaiah chuan Areopagy hmunah hun hman a ni a. Upa V. Renhsanga, LATKP Senior Adviser chuan hunserh hmangin, Rev. David Lalmalsawma, Lawngtlai North Bialtu Pastor chuan fuihna thu a sawi.

‘Hriselna atana- tlan’ hun hi Mizoram chhung leh pawna Bial TKP leh Unit TKP ten anmahni remchan dan angin an hmang bawk.

Mizoram TKP chuan “Hriselna chungchanga thalai ten hma kan sawn theih nan” hma lak chhunzawm zel a tum a, Bial leh Unit huanga hma lakna tur hrang hrangte pawh a duang bawk.